អន្តរជាតិ៖ អ៊ីស្រាអែលនៅតែបន្តបំផ្ទុះគ្រាប់បែក និងវាយប្រហារទៅលើតំបន់ហ្គាហ្សា រួមទាំងទីក្រុងរ៉ាហ្វា (Rafah) ដដែលនៅថ្ងៃសៅរ៍នេះ បើទោះបីជាមានការបញ្ជាពីតុលាការអន្តរជាតិរបស់អង្គការសហប្រជាជាតិ (UN) ដែលបង្គាប់ឱ្យអ៊ីស្រាអែលបញ្ឈប់ប្រតិបត្តិការយោធា និងការវាយប្រហាររបស់ខ្លួនទៅលើតំបន់ហ្គាហ្សា ស្របពេលដែលបទឈប់បាញ់កំពុងត្រូវបានដាក់លើតុចរចានៅឯទីក្រុងប៉ារីស ប្រទេសបារាំង។

ក្រៅតែពីការបង្គាប់ឱ្យអ៊ីស្រាអែលបញ្ឈប់ប្រតិបត្តិការយោធា និងការវាយប្រហាររបស់ខ្លួន តុលាការយុត្តិធម៌អន្តរជាតិ (ICJ) ក៏បានទាមទារឱ្យមានការដោះលែងជាបន្ទាន់នូវចំណាប់ខ្មាំងទាំងអស់ដែលកំពុងស្ថិតក្រោមការឃុំឃាំងដោយពួកសកម្មប្រយុទ្ធប៉ាឡេស្ទីន បន្ទាប់ពីយោធាអ៊ីស្រាអែលបានប្រកាសថា ទាហានរបស់ខ្លួនបានស្វែងរកឃើញសាកសពចំណាប់ខ្មាំងចំនួន ៣នាក់បន្ថែមទៀតនៅតំបន់ភាគខាងជើងតំបន់ហ្គាហ្សា។ 

តុលាការអន្តរជាតិរបស់ UN ដែលមានមូលដ្ឋាននៅឯទីក្រុងឡាអេ ប្រទេសហូឡង់ ក៏បានបញ្ជាឱ្យអ៊ីស្រាអែលបន្តបើកច្រកទីក្រុង Rafah ដែលស្ថិតនៅទីតាំងដ៏សំខាន់រវាងចន្លោះប្រទេសអេហ្ស៊ីប និងតំបន់ហ្គាហ្សាដែលអ៊ីស្រាអែលបានបិទដំណើរការទីតាំងច្រកនេះកាលពីដើមខែឧសភា ក្រោយការប្រកាសវាយប្រហារដោយប្រតិបត្តិការយោធារបស់ខ្លួនលើទីក្រុងនេះ។ យ៉ាងណាក្ដី មកទល់ពេលនេះអ៊ីស្រាអែលហាក់មិនមានការអើពើណាមួយឡើយចំពោះការបង្គាប់របស់តុលាការ ICJ ជុំវិញបញ្ហាទីក្រុងរ៉ាហ្វា ក៏ដូចជាតំបន់ហ្គាហ្សាទាំងមូល ដោយអ៊ីស្រាអែលនៅតែទទូចដដែលៗថា តុលាការអន្តរជាតិរបស់ UN យល់ខុសទៅលើប្រតិបត្តិការយោធារបស់ខ្លួន។ 

ទីប្រឹក្សាសន្តិសុខជាតិ លោក Tzachi Hanegbi រួមជាមួយអ្នកនាំពាក្យក្រសួងការបរទេសអ៊ីស្រាអែលបាននិយាយរួមគ្នានៅក្នុងសេចក្តីថ្លែងការណ៍មួយថា៖ "អ៊ីស្រាអែលដាច់ខាតនឹងមិនបញ្ឈប់ប្រតិបត្តិការរបស់ខ្លួនចេញពីតំបន់រ៉ាហ្វាឡើយ ដោយវានឹងអាចនាំឱ្យមានការបំផ្លិចបំផ្លាញប្រជាជនប៉ាឡេស្ទីនទាំងមូល ឬមួយផ្នែកនៅទីនេះ"។ ដោយឡែកក្រុមសកម្មប្រយុទ្ធប៉ាឡេស្ទីន Hamas ដែលបានគ្រប់គ្រងតំបន់ Gaza តាំងពីឆ្នាំ២០០៧មក បានបង្ហាញនូវការស្វាគមន៍ចំពោះសេចក្តីសម្រេចរបស់តុលាការ ICJ លើបញ្ហាទីក្រុងរ៉ាហ្វា ប៉ុន្តែបានរិះគន់ការសម្រេចចិត្តតុលាការនេះដែលបានសម្រេចមិនរួមបញ្ចូលតំបន់ហ្គាហ្សាទាំងមូលដែលកំពុងស្ថិតក្នុងសភាពហែកហួរដោយសង្រ្គាមក្នុងបទបញ្ជាទៅលើអ៊ីស្រាអែលនេះ៕